تاند ( یک شنبه، د میزان ۶) د پاکستان لومړی وزیرعمران خان وايي، چې د افغانستان سوله د ټولې سیمې لپاره مهمه ده او دوی په دې برخه کې پراخې هڅې کوي.
نوموړي واشنګټن پوسټ ته په یوه لیکنه کې د افغان سولې پر مسئله خبرې کړې دي.
هغه زیاته کړې، پاکستان له دې پروسې سره هر اړخیزه مرسته کړې ده او د امریکا په څېر نه غواړي چې په دغه هېواد کې روانه جګړه اوږده شي.
عمران خان ټینګار کړی، چې افغان جګړه یوازې د خبرو له لارې د حل وړ ده او دا خبرې باید د افغانانو په مشرۍ او مالکیت ترسره شي.
نوموړي یو ځل بیا ویلي، چې پاکستان د افغان سولې د پروسې پوره ملاتړ کوي او په دې برخه کې لا ډېرو اسانتیاوو راوستو ته ژمن دی.
پاکستان داسې مهال د افغان سولې له پروسې د ملاتړ د دوام خبره کوي، چې هم مهاله په دوحه کې د افغان او طالب استازو ترمنځ د سولې خبرې روانې دي خو له دوو اونیو مذاکراتو وروسته لاهم پر یوې اجنډا هوکړې ته نه دي رسېدلي.