تاند ( جمعه، د میزان ۴) د هېواد په مرکز او ولایتونو کې صرافانو د تېرې ورځې راهيسې کاري اعتصاب پيل کړی.
د صرافانو د اتحادیې مسولان وايي دوی دا اعتصاب د بلخ د صرافانو ټولنې د مشر د تښتونې او د صرافانو او سوداګرو امنیت ته د حکومت د نه پاملرنې په غبرګون کې پیل کړی دی.
دوی ګواښ کوي که یې دولت دامنیت خوندیتوب ته پاملرنه ډيره نه کړي خپلې پانګې به له دې هېواده وباسي.
په ورته مهال د سوادګرۍ خونې مرستیال محمد یونس مومند وايي، چې صرافانو په کابل کې ۸ لوی د صرافۍ مارکېټونه او په ټولو ولایتونو کې د صرافانو هټۍ تړلې دي.
دی وایي دغه کاري اعتصاب خلکو او صرافانو ته میلیونونه افغانۍ زیان اړوي.
خوصرافانو وایي د دوی کاري اعتصاب به تر هغه دوام ولري، څو حکومت په دې اړه ورته مثبت ځواب ووایي.