تاند(پنج شنبه، د میزان ۳) د افغانستان برېښنا شرکت له دوو شرکتونو سره د ۱۱۰ مېګاواټه لمريزې او بادي برېښنا د توليد لپاره د څلورو پروژو تړونونه لاسليک کړل.

د ولسمشرۍ ماڼۍ له مطبوعاتي دفتره په خپره شوې خبرپاڼه کې راغلي چې د ولسمشر محمد اشرف غني په حضور کې پرون ماسپښین د افغانستان برېښنا شرکت رئیس داوود نورزي او د زولرستان ساختماني ۷۷ او کواټرو ساختماني شرکتونو ترمنځ، د امریکا متحدو ایالتونو پرمختیایي ادارې (USAID) په مالي مرسته له لمریزې او بادي سرچینو څخه د انرژۍ د تولید په موخه د خصوصي او عامه مشارکت څلور پروژو تړونونه لاسلیک شول.

د پروژو تړونونو د لاسليک پر مهال د پانګونې اسانتیا واحد رئیس عطاالله نصیب وویل:

ولسمشر پر ځان د هېواد د بسیاینې او پانګونه کې د خصوصي سکتور د جذب په موخه ‎د پانګونې اسانتیا واحد ایجاد کړی دی.

هغه زیاته کړه، دغه څلور تړونونه د افغانستان برېښنا شرکت د سترو تړونونو له ډلې څخه دي چې ۱۶۰ میلیون ډالر پانګونه په کې شوې او له ۱۸ څخه تر ۲۷ میاشتو موده کې به د تولیدي ظرفیتونو شبکه کې کابو ۱۱۰ میګاواټه برېښنا زیاته شي.

وروسته د افغانستان برېښنا شرکت رئیس داوود نورزي له لمریزې او بادي سرچینو څخه د انرژۍ د تولید په موخه د خصوصي او عامه مشارکت څلور پروژو د تړون په اړه معلومات وړاندې کړل.

نوموړي د برېښنا انرژۍ په برخه کې د امریکا متحدو ایالتونو له مرستو د مننې پر مهال وویل:

د افغانستان برېښنا شرکت د بریالیتوب معیار د پېرېدونکو رضایت او موخه مو د لا زیاتو خدماتو برابرول، پر ولایتونو د تمرکز زیاتول او د عوایدو لوړول دي.

وروسته په افغانستان کې د امریکا متحدو ایالتونو د سفارت شارژدافیر راس ویلسن وویل، برېښنا ته د افغان ولس لاسرسی د دوی د ژوند د ښه والي لپاره مهم دی. د تجدید وړ انرژۍ د نننیو تړونونو لاسلیک د افغانانو د ژوند د ښه والي، افغان متشبثینو او اقتصادي ودې لپاره د امریکا متحدو ایالتونو د هڅو یوه برخه ده چې د متحدو ایالتونو اوږدمهال تعهد څرګندوي.

ولسمشر غني دغو مراسمو ته په وینا کې وویل:

د خوښۍ ځای دی چې د انرژۍ په برخه کې د خصوصي سکتور د پانګونې شاهدان یوو.

هغه زیاته کړه، د افغانستان برېښنا شرکت له بین المللي بنسټونو او خصوصي برخې سره په همکارۍ د برېښنا ملي شبکې د ایجاد لیدلوری ممکن کړ.

په دغو پروژو کې چې د امریکا متحدو ایالتونو پرمختیایي اداره یې تمويلوي په بلخ ولایت کې د ۴۰ میګاواټه لمریزې انرژۍ، د کابل نغلو د اوبو پر بند څرخېدونکې لمریزې برېښنا انرژۍ ۲۰ میګاواټه، په هرات ولایت کې د ۲۵ میګاواټه بادي او ۲۵ میګاواټه لمریزې څرخېدونکې برېښنا پروژې شاملې دي.