تاند (چهارشنبه د میزان ۲) د مسلح قواو لوی درستیز جنرال محمد یاسین ضیا، د کورنیو چارو وزیر مسعود انداربي او د قاطع ملاتړ ماموریت عمومي قومندان جنرال سکاټ میلر نن له غرمې کندهار ولایت ته سفر وکړ.
د کندهار ولایت له مطبوعاتي دفتره په خپره شوې خبرپاڼه کې ویل شوي چې دغو چاوراکو د کندهار د والي حیات الله حیات تر څنګ په یاد ولایت کې له یو شمېر ځايي چارواکو سره وکتل.
په دې لیدنه کې د کورنیو چارو وزیر مسعود اندرابي وویل، چې افغان ځواکونه په دفاعي حالت کي قرار لري، خو په خبره یې طالبانو د تل په څېر خپلو ترهګریزو بریدونو ته دوام ورکړی دی.
د مسلحو قواوو لوی درستیز جنرال یاسین ضیا هم په خپلو خبرو کې وویل، چې طالبان د سولې له روانو مذاکراتو څخه ناوړه ګټه اخلي.
د ښاغلي ضیا په خبره طالبانو د سړک غاړې او پرسونل ضد ماینونو په شمول خپلو بریدونو ته زور ورکړی، خو زیاتوي چې امنیتي سرتېرو ورته سخت تلفات ور اړولي دي.
د نوموړي په وینا طالبان خپلو ژمنو ته وفادار نه دي او هڅه کوي چې خلک ناارامه کړي.
په همدې حال کې د قاطع ملاتړ ماموریت عمومي قومندان جنرال سکاټ میلر هم د طالبانو وروستیو بریدونو او د تاوترخوالي زیاتوالي ته په اشارې سره ویلي، چې ټوله نړۍ دې حالت ته متوجه ده او باید تاوتریخوالي راکم کړل شي.
طالبانو تر اوسه د یادو چارواکو د څرګندونو په هکله کوم غبرګون نه دی ښودلی.
د یادونې وړ ده چې په دې وروستیو کې د هېواد په ډېرو ولایتونو کې د سړک غاړې ماین چاودنو او هدفي وژنو زور اخیستی چې امنیتي چارواکي یې د طالبانو کار بولي، خو دې ډلې په ځلونو د چارواکو دا ډول ادعاوې رد کړي دي.