تاند(پنج شنبه، د میزان ۳) ولسمشر غني وایي سوله او اوربند یې د چارو لومړیتوب دی.
ولسمشر غني تېره شپه د ویډیو کنفرانس له لارې د ملګرو ملتونو عمومي اسمبلې ته وینا وکړه.
نوموړي د خپلو خبرو پر مهال ویلي چې افغانستان له ګڼو ستونزو سره مخ دی خو تر ټولو لومړیتوب اوربند او سوله دي.
هغه له افغان سولې د ملګرو ملتونو ملاتړ مهم بللی دی او په خبره یې دغه سازمان باید په روانو کړکېچنو حالاتو کې د افغانستان لاسنیوی وکړي.
ولسمشر غني په سیمه کې د ترهګرو مرکزونو ته په اشارې ویلي چې د یوه با ثباته افغانستان لپاره باید په سیمه کې د ترهګرو او ترهګریزو فعالیتونو رېښې له منځه لاړې شي او پر وړاندې یې باید جدي اقدام وشي.
نوموړي دغه راز زیاته کړې چې دوی په افغانستان کې د یوه پیاوړي حکومت د جوړولو او له ناخوالو د راتلونکي نسل د ژغورلو لپاره هلې ځلې کوي او په دې برخه کې د نړیوالو مرستو ته اړتیا لري.
هغه د سولې پروسه یو مهم پرمختګ بولي خو تمه لري چې په دوحه کې روانې خبرې په افغانستان کې د اوربند او جګړو د کمېدو سبب شي.
ولسمشر غني داسې مهال دا څرګندونې کوي چې تیره اونۍ په قطر کې د افغان حکومت او طالبانو ترمنځ د سولې بین الافغاني خبرې پیل شوي چې تر اوسه کومې نتیجې ته رسیدلې نه دي.
بل خوا افغان حکومت ادعا کوي چې ورځ تر بلې د طالبانو تاوتریخوالی زیاتیږي او وضعیت کړکیچن لورې ته روان دی.