تاند(دوشنبه، د سنبلې ۳۱) په افغانستان کې د ملګرو ملتونو مرستندوی دفتر يا يوناما وايي، په وروستيو ورځو کې د ملکي وګړو د مرګژوبلې زياتوالي اندېښمن کړي دي.
یوناما زیاتوي چې د جګړې له ښکېلو اړخونو غوښتنه کوي چې د دوی د خونديتوب لپاره بېړني ګامونه واخلي.
يوناما د سولې نړيوالې ورځې په تړاو اعلاميه کې ويلي:
موږ د ملکي وګړو د مرګژوبلې زياتوالي اندېښمن کړي يو او د جګړې له ښکېلو اړخونو غوښتنه کوو چې په بېړني ډول د ملکي وګړو د خونديتوب لپاره ګامونه اوچت کړي او دوحه کې د سولې خبرو لپاره مناسبه فضا رامنځته کړي.
يوناما زياته کړې که څه هم د وروستيو کلونو په پرتله تاوتريخوالی يو څه کم شوی، خو د دوی موندنې ښيي چې يوازې د شنبه په ورځ په څلورو بېلابېلو پېښو کې ۲۰ ملکيان ووژل شول او ۳۹ نور ټپيان شول.
د خبرپاڼې په حواله، په وژل شوو او ټپيانو کې ښځې، هلکان او نجونې شاملې دي.
یوناما داسې مهال دا څرګندونې کوي چې تیره اونۍ په قطر کې د افغان حکومت او طالبانو ترمنځ د سولې بین الافغاني خبرې پیل شوي چې تر اوسه کومې نتیجې ته رسیدلې نه دي.