تاند، پنجشنبه د سنبلې ۲۷مه: د کورنیو چارو وزارت کابل ولایت لپاره د طالبانو د سرې قطعې د مرستیال د وژل کېدو خبر ورکوي.
د کورنیو چارو وزارت په خبرپاڼه کې راغلي، د طالبانو د سرې قطعې مرستیال غیرت الله مشهور په ملاسنګین نن پنجشنبه تر غرمې وروسته د کابل د سروبي ولسوالۍ اړوند شین خوال سیمه کې د ګډو ځواکونو په عملیاتو کې وژل شوی دی.
سرچینه کاږي په یادو عملیاتو کې له ملاسنګین سره یو ځای د یادې ډلې بل قومندان صلاح الدین صادق هم وژل شوی او لس نور طالب جنګیالي ټپیان شوي دي.
خبرپاڼه زیاتوي، دغه کسان داسې مهال د امنیتي ځواکونو تر برید لاندې راغلل چې سروبي ولسوالۍ کې یې پر امنیتي پوستو د برید پلان درلود.
د کورنیو چارو وزارت وايي ملا سنګین په کابل کې په زیاتو بریدونو کې لاس درلود.
طالبانو تر اوسه په دې هکله څه نه دي ویلي.