تاند، دوشنبه د سنبلې ۲۴مه: د ننګرهار ولایت ځايي چارواکي وايي، چې د فاطمة الزهرا روغتون د بیارغونې پر مهال یې په دغه روغتون کې د مهماتو یوه ډیپو کشف کړې ده.
د راپورونو له مخې له دغې ډيپو څخه بېلا بېلې وسلې او مرمۍ تر لاسه شوي دي.
د مهماتو دغه ډیپو په یاد روغتون کې د وینې بانک د بیارغونې د کار پر مهال موندل شوې او داسې معلومېږي چې په هېواد کې د داخلي جنګونو په وخت کې جوړه شوې وه.
د امنیتي سرچینو د معلوماتو له مخې په دغه ډیپو کې د سپکو او درنو وسلو مرمۍ او لاسي بمونه هم کشف شوي دي.
د سرچینې په وینا کشفي ادارې په دې برخه کې خپلو پلټنو ته دوام ورکوي تر څو په روغتون کې د بیارغونې د کارونو لپاره زمینه برابره شي.
د یادونې وړ ده چې په یاد روغتون کې خلکو ته د روغتیايي خدماتو وړاندې کول هم ځنډېدلي دي.