تاند، دوشنبه د سنبلې ۲۴مه: د امریکا ولسمشر ډونالډ ټرمپ وايي دویم ځل ټاکنو کې یې بریا خپله ده او د درېیم ځل ولسمشرۍ وړتیا هم لري.
هغه چې نن یې د امریکا په نوېډا ایالت کې خپلو پلویانو ته خبرې کولې وویل، په پام کې لري چې د امریکا د ۲۰۲۴ میلادي کال ټاکنو ته هم ځان نوماند کړي.
ټرمپ ویلي که د امریکا په راتلونکو ټاکنو کې د ډیموکرات ګوند کوم غړی بریا ته ورسېږي، نو د امریکا اقتصاد به له صفر سره ضرب کړي.
نوموړي د خپلو خبرو پر دوام په ډیموکرات ګوند توندې نیوکې کړي او زیاته کړې یې ده چې ددوی په بریا سره به ملت له یوې تاریخي ماتې سره مخامخ شي.
تر دې وړاندې د ټرمپ منتقدانو داسې څرګندونې کړې وې چې د ټرمپ د سرزورۍ له امله ښايي د امریکا راتلونکې ټاکنې له ستونزو سره مخ شي.