تاند(شنبه، د سنبلې ۱۵) د کندهار چارواکي وايي، طالبانو ۶ افغان کومانډو ځواکونه د بندیانو د تبادلې په لړ کې د کندهار ولایت مقام ته وسپارل.
د کندهار ولایت مطبوعاتي دفتر نن (جمعه) په یوه خبرپاڼه کې ویلي چې د دې ولایت والي حیات الله حیات د بندیانو پر خلاصون خوښي څرګنده کړه او دا کار یې د سولې لپاره یو مهم ګام وباله.
په خبرپاڼه کې دغه راز ویل شوي چې خوشي شوي کومانډو ځواکونه خپلو کورنیو ته وسپارل شول.
د دغو کسانو له خلاصون سره د بندیانو د تبادلې بهیر بشپړ شوی خو بین الافغاني خبرې، چې ټاکل شوې وه ژر پیل شي، له دې کبله ځنډېدلي چې د طالبانو پلاوی لا بشپړ شوی نه دی.
مخکې طالبانو د عباس ستانکزي په مشرۍ خپل ۲۱ کسیز پلاوی اعلان کړی و خو راپورونه وايي چې د طالبانو په منځ کې د پلاوي د غړیو د ټاکلو پر سر اختلاف دی.
د افغانستان د سولې پلاوی، چې ټاکل شوې وه د پنجشنبې یا جمعې په ورځ قطر ته لاړ شي د طالبانو د پلاوي د نه تکمیلېدو له کبله خپل سفر ځنډولی دی.
د مصالحې د ملي شورا سرچینې وايي، ښايي د دوی پلاوی نن (شنبه) قطر ته لاړ شي.