تاند(جمعه، دسنبلې ۱۴) د پاکستان، شمالي وزیرستان په ګړیوم نومې سیمه کې د سړک غاړې ماین چاودنې له امله درې پاکستاني پوځیان وژل شوي دي.
امنیتي سرچینې وایي په دغو پوځیانو هغه مهال چاودنه شوې کله، چې دوی د سړک جوړونې د کارکوونکو امنیت ساته.
په دې پېښه کې څلور نور پاکستاني سرتېري ټپیان شوي هم دي.
امنیتي مسولان وایي پاکستاني ځواکونو د پېښې په اړه په سیمه کې چاڼیز عملیات پیل کړي دي.
په دې وروستیو کې پر پاکستانیو پوځیانو د بمې چاودنو پېښې ډیرې شوي او عام خلک یې وایي دا پېښې پاکستان کې میشتې دولت ضد ډلې کوي.
د دغې پېښې پړه تر اوسه چا پر غاړه نه ده اخیستې.