تاند، یکشنبه، د سنبلې ۲: د افغانستان د بهرنیو چارو وزارت د پاکستاني حکومت له لوري د طالبانو پر مرستیال مشر ملابرادر او د حقاني شبکې پر مشرانو لګول شوي بندیزونه یو مهم پرمختګ بللی دی.

ددغه وزارت ویاند ګران هېواد نن په یوه خپاره کړي ويډیوي پیغام کې ویلي دوی د پاکستاني حکومت له لوري د ملګرو ملتونو د قراردادونو پر بنسټ د طالبانو او حقاني شبکې پر یو شمېر مشرانو لګول شوي بندیزونه ستایي او په خبره یې دا چاره له ترهګرۍ سره د مبارزې برخه کې یو مهم ګام دی.

تر دې وړاندې د پاکستان د بهرنیو چارو وزارت په یوه خبرپاڼه کې ویلي وو: «د طالبانو پر مشرانو به د سفر او وسلو بندیز، د پیسو او نورو مالي سرچینو کنګل تطبیق شي.»

باید وویل شي چې پاکستان د طالبانو د سیاسي دفتر پر مشر ملا عبدالغني برادر او د حقاني شبکې د مشر سراج الدین حقاني په ګډون یاد بندیزونه لګولي دي.

د پاکستان د بهرنیو چارو وزارت پر خپله ویبپاڼه هم پر طالبانو د بندیز حکم خپور کړی دی.

خو طالبان وايي د پاکستان له لوري د دې ډلې پر یو شمېر مشرانو بندیزونه د افغانستان د سولې د پروسې مخه نیسي.

https://taand.net/%d8%b7%d8%a7%d9%84%d8%a8%d8%a7%d9%86-%d8%af-%d9%be%d8%a7%da%a9%d8%b3%d8%aa%d8%a7%d9%86-%d9%84%d9%87-%d9%84%d9%88%d8%b1%d9%8a-%d8%af-%d8%a8%d9%86%d8%af%db%8c%d8%b2%d9%88%d9%86%d9%88-%d8%aa%d8%b7%d8%a8/