تاند، چهارشنبه، د اسد ۲۹مه: په کابل ښار کې نن سهار دوه چاودنې شوي دي. لومړۍ چاودنه په ارزان قیمت کې د دولسمې ناحیې اړوند سیمه کې رامنځته شوې چې یو نظامي کس یې وژلی دی.
امنیتي سرچیني وايي، په ارزان قیمت کې د پولیسو په یو رینجر موټر چاودنه کې یو تن وژل شوی او یو بل ټپي شوی دی.
دویمه چاودنه د کابل ښار د پینځمې ناحیې اړوند کمپنۍ ساحه کې د پوهنې وزارت د کارمندانو پر موټر شوې، چې په کې د دغه وزارت د علمي شورا رئیس عبدالباقي امین وژل شوی دی.
امنیتي سرچینو د عبدالباقي امین د وژل کېدو خبر تایید کړی دی.
د پوهنې وزارت سلاکار دستګیر منیر هم د پېښې د پخلي تر څنګ ویلي، چې سیمې ته یې د څېړنو لپاره یو پلاوی لېږلی دی.
د امنیتي سرچینو په خبره د امین په موټر کې ماین ځای پر ځای شوی وو.
باید وویل شي چې په دې وروستیو کې په کابل کې بمي چاودنې زیاتې شوي، چې د نظامی کسانو سربېره ملکي خلکو پکې مرګژوبله اوړي.