تاند ( سه شنبه، د اسد ۲۸) د غزني ولایت ځایي اوسېدونکي وایي، چې تېره شپه د دې ولایت په اندړو ولسوالۍ کې پر یوه کورله نا معلوم لوري د هاوان مرمۍ لګېدلې ده.
دوی وایي په دې پېښه کې د یوې کورنۍ ۷ غړي وژل شوي او ۶ نور ټپیان شوي دي.
د ځایي خلکو په خبره په وژل شویو او ټپیانو کې میرمنې او ماشومان شامل دي.
خو په ورته مهال د غزني ولایت امنیتي چارواکي وایي، چې د دغه ولایت په اندړو ولسوالۍ کې پر یو کور د هاوان مرمۍ لګېدو پېښه کې پنځه ملکي وګړي وژل شوي دي.
د والي ویاند واحدالله جمعه زاده د پېښې وایي، چې دا پېښه د اندړو ولسوالۍ لاغرجوی سیمه کې رامنځته شوې ده.
نوموړی زیاتوي د هاوان یاده مرمۍ پر یو کور هغه مهال لګېدلې، چې په یاده سیمه کې د افغان ځواکونو او طالبانو ترمنځ نښته شوې ده.
تر اوسه معلومه نه ده، چې دا مرمۍ د چا له لوري توغول شوې ده.