تاند، یکشنبه، د اسد ۲۶مه: فرانسې په رسمي توګه د افغانستان له حکومت څخه د هغو طالب بندیانو د نه خوشې کېدو غوښتنه کړې چې ددغه هېواد اتباع یې وژلي دي.
د روېټرز خبري آژانس د راپور له مخې د فرانسې د بهرنیو چارو وزارت د افغانستان له حکومت څخه غوښتي، څو هغه درې تنه طالب بندیان چې د فرانسوي اتباعو په وژلو کې یې لاس درلود خوشې نه کړي.
دغه درې کسان د هغو ۴۰۰ طالبانو په ډله کې دي چې ټاکل شوې د افغانستان حکومت یې د ولسمشر په فرمان او د لویې جرګې په غوښتنه خوشي کړي.
فرانسه وايي یادو کسانو یې د اتباعو پر وړاندې جنایت ترسره کړی دی او باید خپله سزا وویني.
تر اوسه د ۴۰۰ طالب بندیانو له ډلې ۸۰ هغه یې خوشې شوي دي. دا بندیان د افغانانو ترمنځ د خبرو لپاره وروستی خنډ بلل کېده.
د امریکا او طالبانو ترمنځ د سولې هوکړې له مخې ټاکل شوې وه چې افغان حکومت ۵ زره طالب بندیان ازاد کړي، خو وروسته بیا په دغه ډله کې پر ۴ سوو بندیانو اختلافونه راپورته شول.
د طالب بندیانو د خوشې کولو په تړاو د ولسمشر د صادر شوي فرمان ۶ ورځې تېرې شوي خو لا هم د طالبانو ۳۲۰ تنه بندیان د حکومت په بند کې دي او د بین الافغاني خبرو د پیل په اړه هم څه نه دي ویل شوي.
بلخوا د ولسمشر یوه سلاکار عزیزالله فضلي ویلي چې دوه ورځې وروسته افغان مرکچي پلاوی دوحې ته روانېږي.