تاند ( چهارشنبه، د اسد ۲۲) د بشري حقونو خپلواک کمیسیون په یوه خبرپاڼه کې د بمي چاودنو له امله د ملکي وګړو پر مرګ ژوبلې اندیښنه ښودلې ده.
یاد کمېسیون له وسله والو طالبانو غوښتنه کړې ده، چې باید د ملکيانو د ژوند خوندیتابه په موخه په لارو کې د ماینونو له خښولو ډډه وکړي.
سرچینې په خبرپاڼه کې لیکلي، چې د کندهار د ارغستان ولسوالۍ خلک وايي، طالبانو د دې ولسوالۍ په هر ځای کې ماينونه ايښي، چې هره اونۍ دوه-درې ماينونه چاودنې کوي او خلکو ته مرګ په کې ژوبله اوړي.
د بشري حقونو خپلواک کمیسیون په خبرپاڼه کې زیاته کړې،چې دوی ته د رسېدلو معلوماتو له مخې په تېرو ۱۰ ورځو کې په ياده ولسوالۍ کې د ۴ چاودنو له امله ۲۱ ملکيان وژل شوي او ۲ نور ټپيان شوي دي.
په خبرپاڼه کې د بشري حقونوخپلواک کمېسیون له طالبانو په کلکه غوښتي، چې د نړیوالو بشرپاله حقونو اصول مراعت او د ملکي خلکو ژوند ته جدي پاملرنه وکړي.
د یادونې ده ، چې په دې وروستیو کې د بمي چاودنو له امله د ملکي وګړو مرګ ژوبله ډیره زیاته شوې ده او دې چارې عام خلک اندیښمن کړي دي.