تاند( دوشنبه، د اسد۲۰) په کابل کې د امریکا د سفارت شارژدافیر راس ویلسن وايي، چې د سولې بین الافغاني خبرې باید د افغانانو په مالکیت او مشرۍ ترسره شي.
وېلس دغه راز په یوه ویډیويي پیغام کې د سولې د وروستیو پرمختګونو هرکلی هم کړی دی.
راس وېلسن له عاموافغانانوهم غوښتي، چې په ټولنیزو رسنیو او نورو وسیلوکې د سولې له پروسې ملاتړ وکړي.
هغه زیاته کړې امریکا په واضح توګه د افغانستان مذاکراتي ټیم او ښکېلو لورو ته ویلي، چې د سولې په خبروکې باید د تېرو کلونو لاس ته راوړنې وساتل شي، د افغانستان ملي حاکمیت او د ټولو افغانانو حقونو ته درناوی وشي.
نوموړي په ټینګار سره ویلي، چې سوله باید افغانستان کې روانه جګړه ختمه کړي.
په کابل کې د امریکا د سفارت شارژدافیر زیاته کړې، چې دوی د افغانستان د اسلامي جمهوریت ملاتړي دي او له دغه هېواد سره خپلو همکاریو ته ادامه ورکوي.
وېلسن ډاډ ورکړ، چې د سولې په برخه کې امریکا د افغان حکومت تر څنګ ولاړه ده.
په ورته مهال د افغانستان لپاره د متحده ایالاتو ځانګړی استازی زلمی خلیلزاد وايي د افغان سولې په برخه کې غوره فرصت رامنځته شوی دی.
زلمي خلیلزاد د لویې جرګې له پرېکړې، چې حکومت به ۴۰۰ طالب بندیان خوشې کوي او د دغو زندانیانو په تړاو د ولسمشرغني له دریځ هرکلی کړی دی.
نوموړي هیله ښودلې چې د زندانیانو د خوشې کولو بهیر ډېر ژر بشپړ او بین الافغاني خبرې پیل شي.