تاند (پنجشنبه، د اسد ۱۶) ولسمشر محمد اشرف غني او د اسټرالیا فورتسیکو مېټل ګروپ کمپنۍ رئیس په افغانستان کې د پانګونې په فرصتونو وغږېدل.
له ارګ څخه په خپره شوې خبرپاڼه کې راغلي چې ولسمشر غني نن له غرمې مخکې د اسټرالیا یوې لویې کمپنۍ رئیس انډریو فوریسټ سره چې د اوسپنې تولید، د کانونو سکتور او د تجدید وړ انرژۍ په برخو کې فعالیت لري، د ویډیو کنفرانس له لارې خبرې وکړې.
ولسمشر په دې آنلاین غونډه کې د اوبو او لمر منابعو د انرژۍ د تولید په برخو کې د پانګونې د فرصتونو په اړه هم بحث وکړ.
سرچینه وايي انډریو فوریست په افغانستان کې د تجدید وړ انرژۍ تولید او کانونو استخراج برخو کې پانګونې لېوالتیا وښوده او ویې ویل چې ډېر ژر به افغانستان ته د ګډ کار په موخه خپلې ارزونې پیل کړي.