تاند (پنج شنبه، د اسد ۱۶) د پښتونخوا ملي عوامي ګوند ویاند هارون ثمر وایي، چې په خیبرپښتونخوا کې له موزیمونو د پښتنو یو شمېر لرغوني اثار پټ شوي دي.
هارون ثمر نن دا خبري د یوه خبري کنفرانس پرمهال رسنیو ته وکړې.
نوموړي زیاته کړه، چې دوی په دې اړه یونیسکو ته هم یو لیک استولی دی او پکې یې له یادې ادارې غوښتنه کړې ده، چې پښتونخوا ته دې د لرغونو اثارو د څار لپاره یو لوړپوړی پلاوی واستوي.
ثمر دغه راز پر پاکستاني حکومت هم تور پورې کړی دی، چې د زړو ودانیو د نښو نښانو ساتلو لپاره یې هیڅ کار نه دی کړی.
هغه وویلې،چې پاکستانی حکومت هڅه کوي د خیبرپښتونخوا تاریخي میراثونه له نابودۍ سره مخ کړي.
بل لورته د پاکستان حکومت تر اوسه په دې تړاو څه نه دي ویلي.