وروستی تعقیب:  تاند، سه شنبه، د ثور ۲۳مه: د ننګرهار ښېوې ولسوالۍ د سیمه یيزو پولیسو د قومندان شیخ اکرم په جنازه کې چاودنې ولسي وګړو ته درنه مرګژوبله اړولې ده.

د ننګرهار د والي ویاند عطا الله خوږیاڼی تاند ته وايي، د سیمه ییزو پولیسو ځايي قومندان شیخ اکرم چې تېره شپه د زړه د حملې له کبله مړ شوی و، نن یوولس بجې یې په جنازه کې چاودنه شوې چې د ولایتي شورا د غړي عبدالله لالاخان ملکزي په شمول ۲۴ کسان په کې وژل شوي او د ولسي جرګې د وکیل ملک قیس نوراغا ملکزي په شمول ۶۸ نور ژوبل دي.

نوموړی وايي، ارقام هره ګړۍ د تغیر وړ دي ځکه د ګڼو ټپیانو روغتیايي وضعیت وخیم دی.

په ولسي جرګه کې د ننګرهار د خلکو استازی حاجي حضرت علي تاند ته تاییدوي چې، په دې جنازه کې ده او د ولسي جرګې بل غړي نوراغا ملکزي هم ګډون کړی و چې نوراغا ملکزی په کې ژوبل شوی دی: (( د نوراغا یو زوی لالا خان ملکزی د ولایتي شورا غړی و چې له له دوه نورو وروڼو سره وژل شوی دی.))

حاجي حضرت علي همداراز وايي، په پېښه کې ۶۰ کسان وژل شوي او له سلو ډېر ژوبل دي.

ځايي سرچینې هم تاند ته تاییدوي چې د پېښې تلفات درانه دي، خو دا نه وايي چې چاودنه ځای پر ځای شوي ماین کړې او که ځانمرګی برید و.

همداراز تاند ته مدني فعال عبدالرحمن معاون لخوا استول شوي انځورونه ښيي چې له چاودنې وروسته مړي ځای ځای پراته دي.

شیخ اکرم له څو کلونو راهیسې په دغه ولسوالۍ کې د سیمه ییزو پولیسو قومندان و چې تېره شپه د ورپېښې ناروغۍ له امله ومړ.

د پېښې بشپړ جزیات وروسته