تاند، یکشنبه، د ثور ۲۱مه: افغان حکومت وايي، د روژې د مبارکې میاشتې په دویمه اوونۍ کې د طالبانو په بریدونو کې ۳۳ سلنه زیاتوالی راغلی چې په ترڅ کې یې ۱۰۰ ملکیانو ته مرګژوبله اوښتې ده.
د ملي امنیت شورا وايي، طالبانو په اتلسو ولایتونو کې د خپلو تحرکاتو او بریدونو په ترڅ کې د روژې د دویمې اوونۍ په ترڅ کې ۲۵ ملکیان وژلي او ۷۴ نور یې ژوبل کړي دي.
ملي امنیت شورا وايي، د طالبانو لخوا د ۳۳ سلنه بریدونو زیاتول په دې معنی دي چې دغې ډلې ته د ملکیانو خوندیتوب او ژوند ارزښت نلري.
دا په داسې حال کې ده چې د ملي امنیت شورا د راپور له مخې طالبانو د روژې د میاشتې په لومړۍ اوونۍ کې ۱۷ ملکیان وژلي او ۴۹ نور یې ژوبل کړي وو.
دا په داسې حال کې ده چې طالبانو د مختلفو لوریو لخوا د اوربند غوښتنه غیر منطقي او غیر معقوله بللې او خپلو بریدونو باندې یې ټینګار کړی دی، په داسې حال کې چې امریکايي لوری وايي، د سولې له هوکړې وروسته پرې طالبانو هیڅ برید نه دی کړی.