تاند- له مودو را په دې د ساینسپوهانو لپاره د برېښنا د انرژۍ زېرمه کول او د بېټریو بیاچارجول یوه مهمه او د پام وړ مسله ده.
په نړۍ کې د الیکترونیکي وسایلو تر ټولو لوی شرکتونه، تحقیقاتي انستیتوتونه او ساینسپوهان مطلوبې نتیجې ته د رسېدو لپاره څېړنو ته دوام ورکوي.
یوه اتلس کلن هندي الاصله امریکايي زلمکي ایشا کهاري د سوپر کپاسیتر (Super-capacitor) په اختراع کولو دې ستونزې ته د حل لار موندلې ده. د ده دې نوښت په نړۍ کې ډېر خلک حیران کړي دي.
ایشا کهاري، چې په کلیفورنیا کې اوسي، د سوپر کپاسیتر د اختراع کولو په وسیله د موبل ټېلفون بېټرۍ په شلو یا ۳۰ ثانیو کې چارجولی شي.
ده د دې اختراع په خاطر د انټل فونډېشن د سکالرشپ پنځوس زره ډالري جایزه وګټله.
ایشا کهاري، چې له ننو کیمسټري یا نانو کیمیا سره مینه لري، وايي: د ده له لوري اختراع شوی سوپر کپاسیتر د موبایل ټېلفون په بېټرۍ کې اېښودل کېدای او لس زره بیا یې چارجولی شي.
دا په داسي حال کې ده چې د موبل ټېلفون اوسنۍ عامې بېټرۍ یوازې زر ځلي بیا چارجېدای شي.
کله چې له ایشا کهاري څخه وپوښتل شول چې دې مسلې ته یې ولي پام اړولی، نو ده وویل:
«زما د موبایل ټېلفون چارج ژر خلاصېده او باید په ساعتونو مې د هغه د بېټرۍ بیا چارج کېدو ته انتظار ایستلی، دا مسله سبب شوه چې په دې فکر وکړم او د حل لار ومومم.»
د ایشا کهاري اختراع، چې لا په لومړنیو پړاوونو کې ده، له ابتدايي موبایل ټېلفونونو رانیولې تر پرمختللې فضايي ټکنالوژۍ پوري په مختلفو الیکترونیکي وسایلو کې کارول کېدای شي.