تاند (سه شنبه، د اسد ۱۴) د بهرنیو چارو وزارت سرپرست وزیر محمد حنیف اتمر تېر ماښام په کابل کې د هند له سفیر ویني کمار سره وکتل.
په دغه لیدنه کې دواړو لوري د حکومت او طالبانو تر منځ د لوی اختر په مناسبت د شوي اوربند په هکله وغږېدل او دا یې په هېواد کې د تلپاتې سولې راوستو په برخه کې مهم ګام وباله.
دواړو لوریو د راتلونکي جمعې په ورځ د دایرېدونکي لویې مشورتي جرګې، د سوله په پروسه کې د سیمه ییزې اجماع رامنځته کېدو، د حکومت او طالبانو تر منځ د بین الافغاني مذاکراتو د ژر پیلېدو او همدارنګه له کورونا سره د مبارزې او په دې برخه کې د هند له لوري افغانستان سره د مرستو په اړه خبرې وکړې.
په کابل کې د هند سفیر ټینګار وکړ چې هېواد یې له افغانستان سره دوامداره همکارۍ ته ژمن دی.
په یاده ناسته کې ښاغلي اتمر د هند له ملاتړ څخه مننه وکړه او د دواړو هیوادونو تر منځ د دوه اړخیزو اړیکو د پراختیا او پیاوړتیا لپاره یې د افغانستان د حکومت ژمنې یو ځل بیا تکرار کړې.