تاند (پنجشنبه، د اسد۹) د امریکا د فضايي تحقیقاتو ادارې، ناسا نن (پنجشنبه) مریخ ته یوه بله ستوربیړۍ ولېږله. دا به په دې سیاره کې د موجودې ستوربیړۍ ځای ونیسي چې په مریخ کې د لرغوني میکروبي ژوند په اړه پلټنه کوي.
ناسا همداراز غواړي چې د لومړي ځل لپاره مریخ ته هیلي کوپتر ولېږي.
د ناسا ستوربېړۍ د افغانستان په وخت د ماسپښین په ۳ بجې او ۲۰ دقیقې د فلوریدا له کیپ کانا وریل څخه د الیانس اتلس وي توغندي په وسله واستول شوه.
د ناسا اداري مشر جیم برایدینشتاین، د توغندي تر توغېدو مخکې وویل «دا په تاریخ کې لومړی ځل دی چې موږ په یوه بله نړۍ کې د ژوند د موندلو لپاره له یوه مشخص ماموریت سره مریخ ته ځو.»
که هر څه له پلان سره سم پر مخ لاړ شي، ستوربیړۍ به مریخ ته د راتلونکي کال د فبرورۍ په ۱۸ مه ورسېږي.
دا د ناسا پنځمه ستوربېړۍ ده چې مریخ ته یې استوي. د ناسا یوه ستوربېړۍ، چې کیوراسیټي نومېږي او له ۲۰۱۲ څخه تراوسه پورې پر مخ ۲۳ زره کیلومتره ګرځېدلې، لا هم فعاله ده.