تاند ( چهارشنبه، د اسد ۸) د خیبرپښتونخوا په باجوړایجنسۍ  کې د یوه برید پرمهال دوه پاکستاني پوځیان وژل شوي دي.

ځايي پولیس وایي، چې په دې پېښه کې دوه نورسخت ټپیان شوي هم دي.

د ځایي پولیسو مشر زیاتوي برید هغه مهال شوی، چې پوځیان په یاده سیمه کې په ګزمه بوخت وو او په خبره يې پېښه د ډیورنډ فرضي کرښې ته څېرمه رامنځته شوې ده.

پولیسو د پېښې په تړاو زیات جزیات نه دي ورکړي خو وایي، چې په اړه یې څېړنې روانې دي.

د ترسره شوي برید پړه هم تر اوسه کومې ډلې پر غاړه نه ده اخیستې.

د یادونې ده، چې د پاکستان په یادو سیمو کې د پاکستاني طالبانو تحریک هم فعالیت کوي او وخت ناوخت د ورته پېښو مسوولیت پر غاړه اخلي.

تېره ورځ هم د ګلګت بلتستان په چیلاس سیمه کې د یوې نښتې پر مهال لس پاکستاني پوځیانو ته مرګژوبله اوښتې وه.

د چیلاس د ځايي پولیسو د مشر په خبره په یاده پېښه کې هم ۵ پولیس وژل شوي او ۵ نور ټپيان وو.