تاند(جمعه، د اسد ۳) د ملي دفاع وزارت ویلي، چې په زابل ولایت کې د امنیتي ځواکونو او طالبانو تر منځ په نښتو کې لسګونه وسله وال طالبان وژل شوي او ټپیان شوي دي.
د ملي دفاع وزارت د جمعې په ورځ په یوه مطبوعاتي اعلامیه کې وویل چې نښتې په ارغنداب ، شينکي او شاه جوی ولسوالیو کې شوې دي.
په خبرپاڼه کې راغلي: “تیره شپه د طالبانو یوې ډلې د زابل په ارغنداب، شينکي او شاه جوی ولسوالیو پر ځینو سیمو د برید پلان درلود.”
خبرپاڼه زیاتوي: “ملي دفاعي ځواکونو د دښمن د دغه ناوړه پلان د پلي کیدو مخه ونیوله.
په دې نښته کې ۲۴ طالبان وژل شوي ۲۷ نور ټپیان شوي دي.”
د سرچینې په وینا ، په دې نښته کې ۴ عرادې موټرونه او د دښمن یو اندازه وسلې او مهمات هم له منځه وړل شوي، او ۱۰ د بوشکو ماینونه، ۲۰ لاسي بمونه، د راډیو مخابراتي بیس او یو شمیر کلاشنکوف ټوپک افغان ځواکونو ترلاسه کړي دي.
د ملي دفاع وزارت د نښتو پرمهال د امنیتي ځواکونو د احتمالي تلفاتو په اړه څه نه دي ویلي.
بل لورته طالبانو هم تر دې دمه د اوښتې مرګ ژوبلې په اړه څه نه دي ویلي.