تاند( چهارشنبه، د اسد ۱) د سوریې رسنۍ وایي، چې د دغه هېواد په الحسکه سیمه کې د امریکایي ځواکونو یو ټانک چپه شوی دی.
سرچینه زیاتوي، چې د دې پېښې پرمهال یوامریکايي سرتېری وژل شوی او څلور نور ژوبل دي.
سوریایي رسنۍ زیاتوي تر اوسه لا څرګنده نه ده، چې د ټانک د چپه کېدو لامل څه و.
په ورته مهال امریکایي ځواکونو هم په سوریه کې د خپل یو سرتېري وژل کېدل تاییدوي خو ډير جزیات یې نه دي ورکړي.
امریکایي ځواکونه وایي ، چې دا سرتېری په یوه غیرنظامي پېښه کې وژل شوی دی.
د امریکا د متحده ایالاتو جمهور رئیس دونالد ټرمپ وړم کال اعلان کړی وو، چې غواړي په سوریه کې میشت شاوخوا دوه زره امریکایي سرتیري له هغه هیواد نه وباسي.
خو اوس، چې د ټرمپ له دې خبرې شاوخوا ۲ کاله تیریږي لاهم امریکایي ځواکونه له سوریې نه دي وتلي او هلته میشت دي.