تاند- امریکايي ساینسپوهانو په دې هیله یو خورا حساس فوتوني سینسر جوړ کړی چې د ناروغیو د چټک تشخیص د تکنالوژۍ له جوړېدو سره به مرسته وکړي.
د یونایتید پریس خبري اژانس د راپور له مخې، تر دې وړاندې ساینسپوهانو د سرطان او بې خوبۍ په شان د بېلابېلو ناروغیو ترمنځ ارتباط او د ککړو حجرو د میخانیکي خواصو په اړه څېړنې کړې وې او نتیجې ته رسېدلي ول، خو د دغو خواصو د چټکې او حساسې پېژندنې لپاره وسایل نشته.
د امریکا د ایلینویز پوهنتون د طبي او انجنیري علومو استاد (ګوراو باهل) وايي، د مایکرو سیلونو او ژوندیو ذراتو په باب د معلوماتو زیاتېدا په بدن کې د دغو خورا وړو شیانو د حرکت، د تومورونو یا دانو د تشکیل، د انسان په بدن کې د سیلونو او بکتریاوو د خپرېدو د څرنګوالي، د ناروغیو د خپرېدو د څرنګوالي او نورو په برخه کې زموږ سره مرسته کوي.
د ایلینویز پوهنتون څېړونکو د اختراع کړي سینسر په اړه په ابتیکا مجله کې معلومات خپاره شوي دي.
د دوی په وینا دا سینسر په ډېر سرعت کار کوي.