تاند، دوشنبه، د جوزا ۲۶ مه: ولسمشر محمد اشرف غني نن د کابینې په غونډه کې امنیتي ادارو ته په جدي ډول امر کړی چې د دیني عالمانو او مذهبي شخصیتونو د امنیت د خوندیتوب لپاره کوټلي ګامونه اوچت کړي.
د ولسمشرۍ ماڼۍ ویاند صدیق صدیقي پر خپله ټویټرپاڼه لیکلي، ولسمشر غني د کابینې په نننۍ غونډه کې پر دیني عالمانو بریدونه په کلکو ټکو وغندل او زیاته یې کړه چې د دوی امنیت ساتل د حکومت او امنیتي ادارو لومړیتوبونه دي.
ولسمشر غني داسې مهال پر دیني عالمانو بریدونه غندي چې د تېرې جمعې په ورځ د کابل ښار د کارته چهار په سیمه کې د شېرشاه سوري په جومات کې د ځای پر ځای شویو چاودېدونکو توکو د چاودنې له امله د یاد جومات د ملا امام په ګډون درې تنه ووژل شول او شاوخوا ۱۵ نور ټپیان شول.
تر دې پېښې څو ورځې وړاندې د وزیر اکبرخان په جومات کې هم د چاودنې په ترڅ کې د دغه مسجد ملا امام او یو شمېر نور ملکي وګړي ووژل شول او ګڼ نور ټپیان شول.
که څه هم د تېرې جمعې د برید پړه تر اوسه کومې ډلې پر غاړه نه ده اخیستې، خو د وزیر اکبرخان پر جومات د برید پړه داعش ډلې منلې وه.