تاند، شنبه، د جوزا ۱۷مه: د بدخشان پولیس وايي چې د دې ولایت په خاش ولسوالۍ کې د ماین چاودنې د سیمه ییزو پولیسو د یو قوماندان په شمول ۱۱ سیمه ییز سرتیري وژلي دي.
د بدخشان د پولیسو ویاند ثناالله روحاني تاند ته پېښه تاییدوي او وایي چې د خاش ولسوالۍ په درخان سیمه کې تېره شپه یوه بجه د امنیتي ځواکونو او طالبانو تر منځ نښته شوې چې په دې نښته کې د طالبانو ولسوال حمید او د هغه دوه ساتونکي وژل شوي دي.
خو هغه زیاته کړه، کله چې د سیمه ییزو پولیسو ځایي قومندان مزار او ورسره ۱۰ سرتیري یې د امنیتي ځواکونو مرستې ته ور روان شوي په لاره کې یې موټر د سړک د غاړې ماین وهلی دی.
د روحاني په وینا ، مزار په خاش ولسوالۍ کې یو له محلي پولیسو قوماندانانو څخه و اوپه چاودنه کې له لسو سرتیرو سره وژل شوی دی.
خاش ولسوالۍ د بدخشان سویل ختیځ کې موقعیت لري.
دا ولسوالي په تیرو کلونو کې له جرم ولسوالۍ څخه جدا شوې ده