په پخوانۍ فارسي کې دا کلمه له سنسکرت یا هندي څخه راغلې ده. د سنسکرت (چل) چې مصدر یې چلنا دی، تګ ته وايي. د فارسي په کلاسیکو ادبیاتو کې د ناز و خرام تګ ته وايي، لګه؛

وای اگر صد را یکی بیند ز دور
تا بچالش اندر آید ازغرور.

کمال الدین اسمعیل

خو په ترکي ژبه چالش جګړې ته وايي. په ترکي کې یې مصدر چالشمق دی.

نظامي وايي:

در میان آندو لشکر گاه زفت
چالش و پیکار آنچه رفت رفت

مولانا وايي:

چالش است این، لوت خوردن نیست این
تا تو بر مالی بخوردن آستین

مولوی

با سگان بر استخوان در چالشی
چون نی اشکم تهی در نالشی

خو په وروستیو ۱۵ کلونو کې، وروسته له دې چې ایرانیانو دا کلمه د انګلیسي د چلینج لپاره استعمال کړه، اوس یې حتي ځیني کسان په پښتو کې هم کاروي. تر دې پخوا به ایرانیانو چلینج «به مبارزه طلبیدن» ترجمه کاوه.

چلینج جګړې ته وايي خو نورې معناوې هم لري. په ځینو مواردو کې ستونزې او په ځینو مواردو کې مقابلې ته د بلنې معنا لري.

مثلاً اکسفورډ انګلیسي په انګلیسي ډکشنري چلینج داسي معنا کوي:

A call to someone to participate in a competitive situation or fight to decide who is superior in terms of ability or strength:

یعني؛ یو چا ته د سیالۍ بلنه ورکول یا یوې داسي جګړې ته څوک رابلل چې د وړتیا او زور له پلوه د یوه برلاسي پکې معلومه شي.

نورې معناوې:

د چا د لیاقت او وړتیا ازمویل

په سپورتي لوبو کې د اتلولۍ یا مسابقې د ګټلو هڅه

د یوه شي د ثابتولو یا توجیه کولو لپاره بلنه

خو نن سبا په فارسي کې چالش د انګلیسي د هر چلینج په ځای راوړل کېږي.

ماخذونه:

فرهنګ معین او اکسفورد دکشنري

عصمت څاروان