زموږ په ټولنه کې کم شمېر خلک له اقتصادي نظره د خوړو په برخه کې په ځان بسیا دي خو ډېر شمېر نور بیا د غربت ښکار دي، دا کلمه د ټولو په خوله ده چې افغانستان کرنیز هېواد دی خو د دې کرنیز او غرني هېواد د خلکو لویه فیصدي بزګران او مالداران دي او تر یوه بریده درې وخته خواړه د لاس په ټناکو او خواریو له خپلو کښتونو ترلاسه کوي خو په ټوله کې د بزګر طبقې اقتصادي او اجتماعي وضعیت خورا اندېښمنوونکی دی.
بزګران یا په عامه اصطلاح دهقانان د ټولنې اصلي خدمتګاران دي چې په خپلو خواریو او زحمتونو باندې توري خاورې په سرو زرو بدلوي، څه موده وړاندې ولسمشر په هیواد کې تولیدیدونکو جنغوزیو (ځڼغوزیو) ته د توري طلا لقب ورکړ چې تولید او خدمت یې د بزګرو په تڼاکو لاسونو باندې کیږي، د زعفرانو روزل چې نړیواله کچه دویم مقام لري د بزګر د خواریو پایله ده چې د افغانستان نوم یې په ټوله نړی کې روښانه کړی او د هیواد د سرلوړی سبب ګرځیدلی دی، دا ډول د بیلابیلو ویټامینونو او منرالونو لرونکو میوو تولید چې د انسان په سلامتیا او روغ ساتلو په برخه کې مهم نقش لوبوي او انسان ته د ناروغیو پر وړاندي ځواک وربښي د بزګر د خواریو څرګنده پایله ده.
موږ تاسې ولیدل چې په ټوله نړۍ د راخپرې شوې وبا کرونا ویروسي ناروغۍ د مخنیوي لپاره د وضعه شوي قرنطین په موده کې هیچا هم ددې هڅه ونکړه چې سره زر، ښکلې موټرې، ښکلی ځیرک مبایل، ځمکې او کورونه واخلي، مګر د نړۍ ټولو وګړو هڅه کړې چې د بزګر په لاس تولید شوي میوې، تازه ترکاري، شیدې… او نور هغه څه چې د روغ پاتې کیدلو لپاره ورته اړتیا ده پېرلي او اړتیا ورته لري. دا ضروري ده چې بزګر د خواریو او زحمتونو احترام وشي.
ننګرهار، لغمان او کونړ د سبزیجاتو او میوه جاتو کافی تولید لري خو همدا تولید شوې میوې او سبزیجات یې په بازار کې په ډیر ناچیزه قیمت پلورل کیږی او یا د امکاناتو نشته والي له امله خرابیږي، حکومت ته په کار ده چې د یادو سیمو بزګرانو لاسنیوی وکړي، سړې خونې او شنې خونې ورته جوړې او د میوه جاتو او سبزیجاتو څخه د بیلابیلو ترلاسه کیدونکو تولیداتو لپاره د پروسس کوچنی دستګاوې رامنځته کړی، ترڅو د دهقانانو په اقتصادی وضعیت کې مثبت بدلون رامنځته شي.
همدارنګه د کرنې وزارت له لوري په ولسوالیو کې په دنده ګومارل شوي د ترویج کارکوونکی باید بزګرانو ته د اصلاح شوو تخمونو، د نباتي ناروغیو مخنیوي، کیمیاوی درملو او سرو کارولو او بسته بندۍ په برخه کې لازمې لارښوونې وکړي تر څو بزګران د خپل خواریو او تڼاکو لاسونو په بدل کې له خپل کښت څخه غوره بدله ترلاسه کړي، او د زرغون افغانستان رامنځته کېدو لپاره پر اساسي او سیستماتیک طرحو او برنامو عملي کار وکړو.