تاند (سې شنبه، د وږي/ سنبلې ۲۴ مه) د ترانسپورت او هوايي چلند وزارت د هوا پېژندنې ادارې د نن سېشنبې په ورځ د افغانستان په یو شمېر ولایتونو کې د سختو بارانونو، تندر او برېښنا، له دوړو سره د تېزو بادونو او ناڅاپي سېلونو خبرداری ورکړی دی.
د دې ادارې د خبرتیا له مخې، نورستان، کونړ، لغمان، کاپیسا، پروان، ننګرهار، کابل، لوګر، میدان وردګ، پکتیا او خوست هغه ولایتونه دي چې اټکل کېږي نسبتاً شدید بارانونه به پکې واوري.
د افغانستان د هوا پېژندنې ادارې ویلي، په بېلابېلو سیمو کې د ورښت اندازه به له ۱۰ تر ۳۵ مليمترو پورې وي او په ځینو سیمو کې د بادونو سرعت ښايي په ساعت کې له ۵۰ تر ۹۰ کیلومترو پورې ورسېږي.
د هوا پېژندنې ادارې د زیانګالو سیمو له خلکو غوښتي چې لازم احتیاطي تدابیر ونیسي او د سیندونو له مسیرونو او هغو سیمو څخه لرې شي چې عموماً پکې سېلونه جاري کېږي.
سږ کال د افغانستان په یو شمېر سیمو کې نسبتاً ډېر بارانونه اورېدلي خو لا هم خلک له وچکالۍ او تر مځکې لاندې اوبو د سطحې د تېټېدو شکایت کوي.