تاند (یکشنبه، د زمري/ اسد ۲۵ مه) په افغانستان کې د پاکستان پخواني سفیر منصور احمد خان په یوه تحلیلي لیکنه کې ویلي چې د کابل او اسلاماباد اړیکې په تېرو پنځو کلونو کې له بېساري ننګونو سره مخامخ شوې دي او پاکستان باید خپله تګلاره له یوازې امنیتمحور سیاست څخه سیاسي تعامل ته بدله کړي.
احمد خان د «پالیسي بیکن» په خپرونه کې لیکلي، د طالبانو له بیا واکمنېدو وروسته د ترهګرۍ او سیمهییزو جیوپولیټیکو عواملو له امله د دواړو هېوادونو اړیکې ترینګلې شوې دي.
هغه ټینګار کړی چې پاکستان باید خپلې امنیتي اندېښنې او د پولې پورې غاړه ترهګري جدي ونیسي، خو دوه اړخیزې اړیکې باید یوازې پر امنیتي مسایلو او پوځي اقداماتو ولاړې نه وي.
د پاکستان پخواني دیپلومات وړاندیز کړی چې د دواړو هېوادونو ترمنځ دې د خلکو قانوني او ثبت شوی تګ راتګ، د نژدې قومي، ټولنیزو او اقتصادي اړیکو له مخې، اسانه شي. نوموړي همداراز د سوداګرۍ، ترانزیټ او اقتصادي همکاریو پراختیا د کابل او اسلاماباد د اړیکو د بیا رغولو لپاره مهمه بللې ده.
احمد خان د افغان کډوالو او پناهغوښتونکو د بېرته ستنولو په اړه هم ویلي چې دا موضوع باید له موجوده واقعیتونو سره سم، په درناوي او همغږۍ مدیریت شي.
هغه وړاندیز کړی چې د افغانستان او پاکستان اړیکې دې په درېیو کچو بېرته ورغول شي:
د دواړو هېوادونو د صدراعظمانو یا بهرنیو چارو وزیرانو په کچه دې سیاسي تعامل پیل شي، څو متقابل باور زیات او امنیتي او اقتصادي ستونزې حل شي؛
د ګډو پولو د مدیریت لپاره دې ادارې یو له بل سره همکاري وکړي، څو د ترهګرۍ مخه ونیول شي او د خلکو او سوداګرۍ تګ راتګ اسانه شي؛
افغانستان او پاکستان دې له ګاونډیو او سیمهییزو هېوادونو سره همکاري پراخه کړي، څو سیمهییز اتصال او اقتصادي اړیکې پیاوړې شي.
هغه د ټاپي ګاز نللیکې، کاسا-۱۰۰۰ برېښنا پروژې او د ازبکستان، افغانستان او پاکستان د رېللارې پروژې د سیمهییزې اقتصادي همکارۍ مهم فرصتونه بللي دي.
احمد خان ویلي چې د کابل او اسلاماباد د اړیکو د ښه کولو لپاره حتمي نه ده چې له بهرني منځګړیتوب څخه کار واخیستل شي، ځکه دواړه هېوادونه د خپلو اړیکو له واقعیتونو ښه خبر دي. خو که ستونزې دوام وکړي، د چین، پاکستان او افغانستان په درېاړخیز چوکاټ کې د «اورومچي نوښت» څخه د اړیکو د عادي کولو لپاره ګټه اخیستل کېدای شي.