تاند (جمعه، د زمري/ اسد ۹ مه) د امریکا د فدرالي مخابراتو کمیسیون (FCC) د Reflect Orbital په نوم نوې شرکت ته د Earendil-1 په نوم د ازمیښتي سپوږمکۍ د توغولو جواز ورکړی دی. د دې سپوږمکۍ له توغولو هدف دا دی چې په مدار کې د یوې هندارې په وسیله د لمر وړانګې د شپې په مخه د ځمکې ټاکلو سیمو ته منعکسې کړي.
سره له دې چې ساینسپوهانو او چاپېریالي بنسټونو د دې پروژې سخت مخالفت کړی، د امریکا فدرالي مخابراتي کمیسیون ویلي چې د رڼا ککړتیا، د ستورپوهنې پر ټېلسکوپونو اغېزې او له راډیويي څپو پرته نور چاپېریالي اغېزونه د دې ادارې د قانوني صلاحیت برخه نه دي.
له همدې امله، کمیسیون د دې ازمیښتي پروژې د پیل اجازه ورکړې، پرته له دې چې د هغې د اغېزو رسمي ارزونه وشي. په داسې حال کې چې خصوصي شرکتونه له فضا څخه د مصنوعي رڼا د تجارتي هڅې کوي، دې پرېکړې د فدرالي څارنې په برخه کې یوه څرګنده تشه رامنځته کړې.
ستورپوهانو او د طبیعت ساتنې سازمانونو د دې پرېکړې په اړه ژوره اندېښنه څرګنده کړې ده. د امریکا د ستورپوهنې ټولنې خبرداری ورکړی چې دا ټکنالوژي ښايي د حکومت له خوا تمویلېدونکو ستورپوهنیزو څېړنو ته جدي او حتی «د ناورین تر بریده» زیان ورسوي.
همدا ډول، د نړیوال تیاره اسمان Dark Sky International په څېر بنسټونه وايي چې د شپې مصنوعي رڼا د انسانانو د خوب او بیدارۍ طبیعي سیستم (Circadian Rhythm) ګډوډوي او د شپې فعالو ژوو او وحشي ژوند ته هم زیان رسوي.
که د Reflect Orbital ازمیښتي پروژه بریالۍ شي، شرکت پلان لري چې تر ۲۰۳۵ کال پورې شاوخوا ۵۰ زره هنداره لرونکې سپوږمکۍ فضا ته ولېږي.
منتقدان خبرداری ورکوي چې د دومره لوی شمېر سپوږمکیو شتون به د نړۍ تر ټولو تیاره اسمانونه د تل لپاره روښانه کړي او د ځمکې له سطحې څخه به د ستورو او کهکشانونو علمي څارنه او ستورپوهنیزې څېړنې تقریباً ناممکنې کړي.