تاند (چهارشنبه، د چنګاښ/ سرطان ۳ مه) د پاکستان د ملي اسمبلۍ د اپوزیسیون مشر او د پښتونخوا ملي عوامي ګوند (پښتونخوا ملي عوامي پارټۍ) مشر محمود خان اڅکزي د ملي اسمبلۍ په غونډه کې د وینا پر مهال وویل چې پاکستان د بېلابېلو قومونو لپاره په یوه زندان بدل شوی او حکومت نه شي کولای خلک د زور او مرمیو په وسیله چوپ کړي.
نوموړي د ملي اسمبلۍ رئیس ته په خطاب کې وویل: «تاسو ټول د اساسي قانون د سرغړونې مجرمان یاست. تاسو اساسي قانون تر پښو لاندې کړی او د هغه سرغړونه مو کړې ده. پاکستان د قومونو لپاره په یوه زندان بدل شوی دی. لومړی پښتانه، بلوڅان، سندیان او سرایکیان او اوس کشمیریان هم له ورته وضعیت سره مخامخ دي.»
اڅکزي تور پورې کړ چې حکومت د پاکستان په نوم د پښتونخوا د اوبو، ګازو او نورو طبیعي زیرمو د کنټرول هڅه کوي او هر هغه څوک چې د دغو شتمنیو د ساتنې هڅه وکړي، د ترهګرۍ په قضیو کې ښکېلوي.
هغه زیاته کړه: «تاسو خلک په مرمیو نه شئ غلي کولای. کشمیریان چیغې وهي چې کشمیر دې له پاکستان سره یوځای شي، نو بیا د دې ټولو اقداماتو اړتیا څه وه؟»
د راپورونو له مخې، د اڅکزي د وینا یوه برخه سانسور شوه او د دولتي تلوېزیون له لوري په ژوندۍ بڼه خپره نه شوه.
اڅکزي د ملي اسمبلۍ پر رئیس هم نیوکه وکړه او ویې ویل چې د خپلې دورې په ترڅ کې یې د اساسي قانون او قوانینو درناوی نه دی کړی او ۱۴ غړي یې له اسمبلۍ څخه ایستلي دي.
هغه د سیاسي بندیانو د سزاوو په اړه وویل: «د کوټ لکپت زندان بندیان ټول له اویا کلنۍ پورته عمر لري. لږ تر لږه د خدای ویره وکړئ. تاسو یو نوی ریکارډ جوړ کړی؛ پنځو کسانو ته مو ټولټال ۲۸۶ کاله بند سزا ورکړې ده. تاسو ماهرنګ بلوڅې ته هم د عمر بند سزا ورکړې ده، دا د سرو زرو مډال دې هم درته مبارک وي.»
نوموړي د پاکستان له صرداعظم شهباز شریف څخه وغوښتل چې له بلوڅانو، سندیانو او د خیبر پښتونخوا له استازو سره خبرې وکړي او د هغوی پر طبیعي سرچینو د هغوی حق ومني.
اڅکزي وویل: «پاکستان یوازې یو نوم نه دی؛ پاکستان د بلوچستان، سند، خیبر پښتونخوا او پنجاب مجموعه ده. ولې خیبر پښتونخوا پاکستان نه ګڼئ؟»
هغه د قضائیې په چارو کې د پارلمان پر رول هم نیوکه وکړه او ویې ویل چې د رایو له لارې د عدلیې واک محدود شوی دی.
د پاکستان تحریک انصاف د بنسټګر عمران خان د زنداني کېدو په اړه اڅکزي وویل: «زه خواشینی یم چې عمران خان په زندان کې دی. هغه څه کړي دي؟»
د راپور له مخې، د اڅکزي د وینا له پیل سره سم د پاکستان دولتي تلوېزیون ژوندۍ خپرونه بنده کړه او د انټرنېټي خپرونې (وېب سټریم) بهیر هم ودرول شو.