تاند (شنبه، د غبرګولي/ جوزا ۳۰ مه) بریتانیايي رسنیو د جمعې په ورځ راپور ورکړ چې په دغه هیواد کې اووه کسان د جنسي تېري، د انسانانو د قاچاق او پر ماشومانو د جنسي جرمونو د ۳۸ تورونو په تړاو محکمې ته حاضر شوي دي.
دغه قضیه د هغو پلټنو برخه ده چې د «ګروومینګ ګېنګونو» یا د جنسي استثمار د شبکو په اړه روانې دي.
دغه اووه کسان، چې شپږ یې ۲۰ کلن او یو یې ۲۱ کلن دی، د جمعې په ورځ د نارویچ کراون محکمې ته حاضر شول. د محکمې له ودانۍ بهر یو شمېر اعتراض کوونکي هم راټول شوي وو.
پولیسو ویلي چې تورن کسان افغانان او کډوال دي. پر دوی تور دی چې د ۲۰۲۳ کال د اګست او د ۲۰۲۵ کال د مې ترمنځ یې پر دوو تنو جنسي جرمونه کړي دي.
د ژباړن په مرسته، ټولو اوو کسانو خپل نومونه او د زېږېدو نېټې تایید کړې او د لګېدلو تورونو په اړه یې ځانونه بېګناه وبلل.
د نورفوک پولیسو ټینګار کړی چې له دغو تورنو کسانو څخه هېڅ یو هم د نورفوک په پناهغوښتونکو هوټلونو کې نه اوسېده او یاد جرمونه هم په دغو هوټلونو کې نه دي شوي.
د راپور له مخې، له تورنو کسانو څخه پنځه تنه بریتانیا ته د وړو کښتیو له لارې او یو بل د باروړونکي موټر (لارۍ) له لارې داخل شوي دي.
په دې قضیه کې اتم شکمن، چې ۱۹ کلن دی، د مې په ۲۲مه د ګرادا سیوچانا Garda Síochána د پولیسو له خوا په ایرلنډ کې نیول شوی او لا هم هلته په توقیف کې دی.