تاند (شنبه د غبرګولي/ جوزا ۲۳مه) د هندي ټلوېزیوني ډرامې «کمکم بهاګیه» ځوانې اداکارې سنچیتا اوګلې ځان وژنه کړې ده.
د هندي رسنیو د راپورونو له مخې هغې د ۲۲ کلونو په عمر ځان وژنه وکړه.
پولیس وایي چې،د پېښې له ځایه یې کوم شکمن توکی یا د ځان وژنې لیک نه دی موندلی.
سنچیتا اوګلې تر مړینې څو ساعته وړاندې پر خپلې ټولنیزې پاڼې انسټاګرام هم یوه وېډیو خپره کړې وه.
«کورنۍ د کومې توطئې شک نه لري»
پولیس زیاتوي: “د پېښې له خبرتیا سره سم پولیسو ځای معاینه کړ. موږ هلته هېڅ شکمن شی ونه موند او د ځان وژنې کوم لیک هم ترلاسه نه شو.”
هندي رسنۍ په خپلو راپورونو کې د پولیسو په وینا زیاتوي چې، د اداکارې پلار د هغې د مړینې په اړه پر کومې توطئې شک نه لري او هېڅوک د دې پېښې مسؤل نه ګڼي.
د سنچیتا جسد د عدلي طب (پوسټ مارټم) لپاره دولتي روغتون ته لېږدول شوی دی.
پولیسو د هغې د ناڅاپي مړینې قضیه ثبت کړې او د دې سخت اقدام د علت معلومولو لپاره یې پلټنې پیل کړې دي.
سنچیتا په «چھاوا» فلم کې هم لوبېدلې وه.
سنچیتا اوګلې د تلویزیوني سریال کمکم بهاګیه کې د دیا ټنډن د رول له امله ډېره مشهوره شوې وه.
هغې همدارنګه په واګلې کي دنیا – نوی نسل، نوې کیسې سریال کې هم کار کړی و او وروسته یې د دل والی دولها لے جایګي (Dilwali Dulha Le Jayegi) په نوم سریال کې مرکزي رول ترلاسه کړ.