تاند (پنجشنبه د غبرګولي/ جوزا ۷مه) د راپورونو له مخې، د بنګله دېش حکومت هغه مشهوره مېښه له قربانۍ وژغورله چې، په ټولنیزو رسنیو کې د امریکا د ولسمشر، ډونالډ ټرمپ څېرې ته د ورته والي له امله د ټرمپ په نامه مشهوره شوې ده.
د بنګله دېش حکومت پرون چهارشنبه مخکې له دې چې دغه مېښه د لوی اختر په مناسبت د عامو خلکو له خوا قرباني شي، مداخله وکړه او د امنیتي اندېښنو له امله یې د هغې د ساتنې پرېکړه وکړه.
د رسنیو د راپورونو له مخې دغه نادره سپین رنګه مېښه، چې د سرو وېښتانو له امله د “ټرمپ مېښې” په نوم مشهوره شوې، په وروستیو ورځو کې په ټولنیزو رسنیو کې د ګڼو ویډیوګانو او انځورونو له کبله د خلکو پام ځان ته اړولی و.
سرچینې وایي چې، زرګونه کسان د هغې د لیدو لپاره فارم ته ورمات شوي وو، چې له امله یې ګڼه ګوڼه هم جوړه شوې وه.
اوس د بنګله دېش حکومت پرېکړه کړې چې، دغه مېښه به د ډاکې ملي ژوبڼ کې وساتل شي.