تاند (چهارشنبه، د غويي/ ثور ۳۰ مه) د ترانسپورټ او هوايي چلند وزارت ویلي چې نن (چهارشنبې) د هېواد په ۲۹ ولایتونو کې د باران، تالندې او ناڅاپي سېلونو احتمال شته.
دغه وزارت پرون (سېشنبې) پر خپلې اېکسپاڼې لیکلي چې د چهارشنبې په ورځ په بدخشان، تخار، کندوز، بغلان، سمنګان، پنجشېر، پروان، کاپیسا، لغمان، نورستان، کونړ، ننګرهار، کابل، لوګر، پکتیا، خوست، پکتیکا، میدان وردګ، غزني، بامیان، دایکنډي، غور، فراه، هرات، بادغیس، فاریاب، سرپل، جوزجان او بلخ ولایتونو کې د سختو بارانونو، تالندې او ناڅاپي سېلونو اټکل شوی دی.
وزارت زیاته کړې چې په بېلابېلو سیمو کې د باران اندازه له ۱۰ تر ۳۵ میلیمترو پورې اټکل شوې ده.
همداراز ویل شوي چې په مرکزي، شمالي، شمال ختیځو، لویدیځو، جنوبي، جنوب ختیځو او ختیځو ولایتونو کې د سختو بادونو د لګېدو امکان هم شته، چې سرعت یې ښايي په ځینو سیمو کې په ساعت له ۵۰ تر ۹۰ کیلومتره پورې ورسېږي.
سږ کال د افغانستان په ګڼو ولایتونو کې له سختو ورښتونو وروسته سېلونه جاري شوي او له کبله د سومال تاوانونه اوښتي دي.