تاند (سې شنبه، د غويي/ ثور ۲۹ مه) د امریکا ولسمشر ډونالډ ټرمپ د دوشنبې په ورځ وویل چې پر ایران پوځي برید، چې د سبا لپاره پلان شوی و، د قطر، سعودي عربستان او متحده عربي اماراتو په غوښتنه یې ځنډولی دی.
ټرمپ په خپله خواله رسنۍ «ټروت سوشیل» کې لیکلي چې د قطر تمیم بن حمد الثاني، د سعودي عربستان محمد بن سلمان او د متحده عربي اماراتو محمدبن زید النهیان ورڅخه غوښتي چې د ایران پر ضد پلان شوی برید وځنډوي، ځکه اوس جدي خبرې روانې دي او هغوی باور لري چې داسې یو تړون به وشي چې د امریکا، د منځني ختیځ د هېوادونو او نورو لپاره به د منلو وړ وي.
هغه زیاته کړې چې د دغه احتمالي تړون مهم ټکی دا دی چې ایران به هیڅ اتومي وسله ونه لري.
ټرمپ همداراز ویلي چې د دغو مشرانو په درناوي یې د امریکا د دفاع وزیر پیټ هګسیت، د ګډو ځواکونو د لوی درستیز ډانیل کاین او امریکايي پوځ ته امر کړی چې سبا به پر ایران پلان شوی برید نه کوي.
خو هغه خبرداری ورکړی چې که د منلو وړ هوکړه و نه شي، امریکايي ځواکونه به چمتو وي څو په ډېر لنډ وخت کې پر ایران پراخ او بشپړ برید پیل کړي.