تاند (پنجشنبه، د غويي/ ثور ۱۰ مه) د چهارشنبې په شپه د کوټې پر ګڼ مېشتو سیمو لږ تر لږه څلور توغندي ویشتل شوي، چې له امله یې د اوسېدونکو په منځ کې ویره خپره شوې او څو کورونو ته زیان اوښتی دی. په پېښه کې د مرګ ژوبلو راپور نه دی ورکړل شوی.
پولیسو ویلي چې دا توغندي د «بياېم-۱۲» ډول وو او له نامعلوم لوري توغول شوي دي.
دا ډول وسلې د بلوچستان د بغاوت د لومړیو کلونو پر مهال کارېدلې، خو په وروستیو کلونو کې ډېر کم لیدل شوي چې له دې ډول وسلې څخه دې هلته کار اخیستل شوی وي.
چارواکو ویلي چې د پېښې په اړه پلټنې روانې دي، او تر اوسه کومې وسلهوالې ډلې د دې برید مسوولیت نه دی منلی.
د بلوچستان ایالت اکثره سیمې ناکراره دي او په دې ایالت کې بلوچ بېلتون غوښتونکي ډېر فعال دي.