تاند(سې شنبه، د غويي/ ثور لومړۍ) د نړیوال سره صلیب کمېټه وایي، د افغان او پاکستاني ځواکونو ترمنځ د وروستیو دوو میاشتو د نښتو په پایله کې په نورستان ولایت کې شاوخوا ۱۳۶ زره کسان له جدي بشري ستونزو سره مخامخ شوي دي.
د دې بنسټ د راپور له مخې، په دې شمېر کې نژدې ۱۷ زره کورنۍ شاملې دي چې تر ټولو ډېر زیان د کامدېش او برګمټال ولسوالیو خلکو ته اوښتی دی. دغو کورنیو ته د خوړو د کمښت، د روغتیايي خدمتونو د نشتوالي او د ژوند د لومړنیو اړتیاوو د محدودیت په شان ستونزې پېښې شوي دي.
د مرستو پیل، خو اړتیاوې لا هم لوړې دي
راپور زیاتوي چې د نړیوال سره صلیب کمېټې، د افغانستان سرې میاشتې او د ملګرو ملتونو د ادارو په همکارۍ د بیړنیو مرستو لړۍ پیل شوې ده. په دې مرستو کې خوراکي توکي، درمل، او نور اړین بشري توکي شامل دي.
همداراز ویل شوي چې د اپرېل له پیل راهیسې له ښکېلو خواوو سره خبرې روانې وې، څو بشري مرستندویانو ته د خوندي او بېخنډه لاسرسي زمینه برابره شي. له دغو خبرو وروسته، اوس مرستندویې ادارې توانېدلې چې زیانمنو سیمو ته خپل فعالیتونه ورسوي.
د وضعیت نسبي ښه کېدا، خو ستونزې دوام لري
د راپور له مخې، د ځینو لارو له بیا پرانیستل کېدو سره بازارونه ورو ورو بېرته فعالېږي او د بیړنیو روغتیايي خدماتو بهیر هم بیا پیل شوی دی. سره له دې، لومړنۍ ارزونې ښيي چې د خوړو خوندیتوب، روغتیايي خدمتونو او نورو اساسي خدماتو ته لا هم جدي اړتیا شته.
د دوامداره ملاتړ غوښتنه
بشري ادارو ټینګار کړی چې د زیانمنو خلکو د اړتیاوو د پوره کولو لپاره دوامداره نړیوال ملاتړ پکار دی. دوی له ټولو اړخونو غوښتي چې د مرستو رسولو لپاره خوندي، دوامداره او بېخنډه لاسرسی یقیني کړي، څو د نورستان د خلکو کړاوونه راکم شي.