تاند (چهارشنبه د وري – حمل ۱۹مه) افغانستان کې د طالبانو د حکومت د ټولګټو چارو وزارت ویاند تازه په خپله اېکس پاڼه د کابل ـ جلال اباد د لویې لارې د پرانیستل کېدو خبر ورکړی دی.
محمد اشرف حق شناس ویلي چې،دغه لار د تېرې جمعې ورځې راهیسې د باران، سیلابونو او له غره څخه د تېږو د لوېدو له امله د تنګي غارو په سیمه کې تړل شوې وه.
حق شناس زیاته کړه چې، د دوی د شپې او ورځو هڅو په پایله کې دغه لار اوس د ترافیکو پرمخ خلاصه ده.
نوموړي له موټرچلوونکو غوښتنه کړې چې، پر دې لاره د تګ پرمهال له احتياط څخه کار واخلي څو په خوندي ډول خپل هدف ته ورسېږي.
د کابل ـ جلال اباد لویه لار وخت نا وخته د سختو ورښتونو او سېلابونو او له غره څخه د تېږو د ښویېدو له امله تړل کېږي چې، مسافر یې له امله سختو ستونزو سره مخ وي.