تاند (شنبه، د کب/ حوت ۲۳ مه) د افغانستان او پاکستان ترمنځ د نښتو په دوام کې افغان دفاعي ځواکونو نن د پاکستان لږترلږه درې پوستې نیولي دي.
د افغانستان دفاع وزارت وايي، د پکتیکا ولایت د برمل ولسوالۍ په پوله کې نن شپه د پاکستان یوه پوسته نیولې ده.
دفاع وزارت وايي، د ردالظلم غچ اخیستونکو عملیاتو په دوام کې یې د ډنګرلګډ په نوم پوسته له پاکستاني پوځیانو نیولې او د دې پوستې د نیولو د عملیاتو په ترڅ کې یې یو پاکستانی ټانک ویجاړ کړی دی.
همداراز نن (شنبه) ماښام ځاځي میدان ولسوالۍ ته څېرمه د پاکستاني پوځ د (جنډوسر) پوسته هم افغان ځواکونو ته په لاس ورغلې ده.
د دواړو پوستو د نیولو په ترڅ کې د مرګ ژوبلې په اړه څه نه دي ویل شوي.
خو تر دې وړاندې نن سهار دفاع وزارت وویل چې کونړ او ننګرهار ته څېرمه د کرښې هغې غاړې ته یې د پاکستاني پوځیانو یوه پوسته نیولې او ۱۴ پوځیان یې وژلي دي.
پاکستان تراوسه په دې اړه څه نه دي ویلي خو پاکستان عموماً د خپلو پوستو د بایللو په اړه څه نه وايي او د افغان لوري ادعاوې بې له دې چې د کوم ځانګړي مورد یادونه وکړي، په مجموعي ډول ردوي.