تاند (دوشنبه د کب – حوت ۱۸مه) د رویټرز خبري اژانس د راپور له مخې د امریکا کلیفورنیا ایالت کې یوې ۳۰ کلنې ښځې له خپل موټر څخه د مشهورې سندرغاړې «ریحانې» پر کور ډزې کړې دي.
د لاس انجلس پولیسو ویلي چې، د ماسپښین په شاوخوا یوه نیمه بجه د پیښې ځای ته ور رسېدلي او د لومړنیو تحقیقاتو وروسته تائید کړې چې، یوه مرمۍ د کور پر دیوال لګېدلې ده.
پولیس وایي په دې برید کې چا ته زیان نه دی رسېدلی.
رویټرز په خپل راپور کې ویلي چې، د برید کوونې په اړه د پولیسو څېړنې ښيي چې ویښتان یې ګنډلي او کریم رنګه کمیس یې درلود او له برید شاوخوا ۳۰ دقیقې وروسته د پلورنځي په پارکینګ کې نیول شوې ده.
پولیس وایي سندرغاړې ریحانه د پیښې پرمهال په کور کې وه.
د مالوماتو له مخې ریحانه له خپل خاوند او درېیو کوچنیو ماشومانو (دوه هلکان او یوه پنځه میاشتنۍ نجلۍ) سره په دغه کور کې ژوند کوي.
پولیسو تر اوسه د شکمن کس په اړه نور جزییات نه دي خپاره کړي.