تاند (جمعه، د سلواغې/ دلوې ۳ مه) د ازبکستان چارواکي وایي، د سرخاندریا په سیمه کې یې د افغانستان د اومو سرو زرو د تصفیې او پروسس کار رسماً پیل کړی دی.
د افغانستان ۲۰ کیلوګرامه اومه سره زر چې ارزښت یې ۲.۹ میلیون ډالره دی، د «ترمذ ګولد پروډکشن» شرکت ته سپارل شوي دي.
یاد شرکت د ترمذ د نړیوال سوداګریز مرکز په ازاده اقتصادي سیمه کې دننه د ګاڼو د تولید په برخه کې فعالیت کوي.
د چارواکو په وینا، هغه سره زر چې مخکې به یوازې د ازبکستان له لارې نورو هېوادونو ته ترانزیت کېدل، اوس به په همدې هېواد کې د لوړ ارزښت لرونکو نیمهجوړ ګاڼو په محصولاتو بدل شي او بیا به صادر شي.
د سرخاندریا د ګمرک اداره وایي چې دا پروژه د ځایي چارواکو او د ګمرک د کمېټې په ملاتړ عملي کېږي، او موخه یې د ګمرکي بهیرونو اسانه کول، د صنعتي ظرفیت لوړول او د ګاڼو صنعت پیاوړی کول دي.
د ازبکستان چارواکي باور لري چې دا ګام به د پانګونې فضا ښه کړي او د صادراتو په زیاتېدو کې به مرسته وکړي؛ دا بدلون د دواړو ګاونډیو هېوادونو ترمنځ د کانونو په برخه کې د اقتصادي همکاریو د پراخېدو نښه بلل کېږي.
تر دې مخکې هم متحده عربي اماراتو او ازبیکستان د اوزبکستان د کانونو د سکتور د پراختیا لپاره یو تفاهملیک لاسلیک کړی و.
د ازبکستان چارواکو ټینګار کړی چې دا نوښت به په سیمه کې د پانګونې جذابیت زیات کړي او د ګمرک کړنلارې به ساده کړي.