تاند ( پنج شنبه د سلواغې ـ دلوې ۲مه) د میدان وردګو ولایت امنیه قوماندانۍ مطبوعاتي دفتر د یوې خبرتیا په خپرولو سره ویلي، د کابل–کندهار لویه لاره د دې ولایت په بېلابېلو سیمو کې د تېز باد او پرله پسې واورې ورېدو له امله د هر ډول ترافیک پر مخ تړلې ده.
سرچېنې له مسافرو غوښتي، چې تر بلې خبرتیا پورې له دې لارې د تګ هڅه ونه کړي.
اخوا بیا د میدان وردګ ولایت له پېښو سره د مبارزې ریاست ویلي، د دغه ولایت جلریز، نرخ، سیداباد، چک، جغتو، دایمیرداد، حصه اول بهسود، مرکزې بهسود ولسوالیو لارې د واروې د ورښت له امله بندې دي.
یاد ریاست زیاتوي چې، له دې امله خلک د سفر کولو پرمهال له ستونزو سره مخ دي.
یاد ریاست دغه راز ویلي، هڅه کوي چې دغو ولسوالیو ته تللې لارې د تګ راتګ پر مخ خلاصې کړي.
دا لار داسې مهال تړل کېږي چې، نن د هېواد په ۳۰ ولایتونو کې د واورې او باران اټکل شوی دی.
عملا په ګڼو ولایتونو کې باران او واوره ورېږي.