تاند (سې شنبه، د مرغومي/ جدې ۳۰ مه) ګوګل د جيمیل کاروونکو لپاره یو مهم او تاریخي اپډېټ معرفي کړی، چې پر اساس به یې کاروونکي په لومړي ځل خپل اصلي جيمیل برېښنالیک پته بدلولی شي. دا فیچر د جيمیل په شل کلن تاریخ کې لومړی ځل وړاندې کېږي.
د امریکايي رسنیو د راپور له مخې، د نوي اپډېټ له مخې کاروونکو ته اجازه ورکول کېږي چې په هر ۱۲ میاشتو کې یو ځل د خپل اصلي جيمیل پته بدله کړي، خو په مجموع کې به یوازې درې ځله د بدلون اجازه ولري. د دې اقدام موخه دا ده چې کاروونکو ته پر خپلې ډیجیټلي پېژندنې ډېر کنټرول ورکړل شي.
ګوګل وایي دا اپډېټ د عصري مصنوعي ځیرکتیا (AI) پر بنسټ د یوه پراخ پلان برخه ده، چې پکې له تصویرونو، جيمیل او نورو خدماتو سره د «جېمینای AI» ژور یوځای کېدل شامل دي.
د سایبري امنیت کارپوهان وایي دا فیچر کولی شي د انلاین خوندیتوب په ښه کېدو کې مرسته وکړي. د نوې برېښنالیک پتې په کارولو سره، کاروونکي کولی شي مهم حسابونه (اکاونټونه) ورسره وتړي، چې له امله یې غیر ضروري پیغامونه، د بازارموندنې ډیټابېسونه او له پخوانۍ پتې سره تړلي د معلوماتو د افشا کېدو خطرونه کمېږي.
متخصصان وایي پخوانی برېښنالیک ادرس د هغو خدماتو لپاره کارول کېدای شي چې لږ کار ترې اخیستل کېږي، او د جيمیل د فلټرونو له لارې راتلونکي پیغامونه هم په اغېزمن ډول تنظیم کېدای شي.
که څه هم ګوګل د سپم پر ضد قوي سیستمونه لري، خو متخصصانو کاروونکو ته د احتیاط سپارښتنه کړې، ځکه هېڅ سیستم سل په سلو کې خوندي نه وي.
ګوګل چې د الفابیټ شرکت ملکیت دی، تایید کړې چې دا فیچر به په تدریجي ډول کاروونکو ته فعال شي، نو که دا اسانتیا دا مهال د کوم کاروونکي لپاره موجوده نه وي، ډېر امکان شته چې په نژدې راتلونکي کې به د هغه حساب (اکاونټ) ته هم اضافه شي.