تاند (دوشنبه، د مرغوميږ جدې ۲۲ مه) د ایران ولسمشر مسعود پزشکیان په خپل هیواد کې د وروستیو اعتراضونو په غبرګون کې ولس ته په وینا کې ویلي چې حکومت هڅه کوي ستونزې حل کړي او د خلکو ستونزې راکمې کړي.
ولسمشر پزشکیان ټینګار کړی چې هیڅ بهرني ته به اجازه ورنه کړي چې په ملت کې د نفاق تخم وکري، او ژمنه یې کړې چې د خلکو د ژوند د ښه والي لپاره به هره ممکنه هڅه کوي.
پزشکیان د ټولنې له ټولو قشرونو غوښتي چې د ګډوډیو پر ضد ودرېږي، او زیاته کړې یې ده چې د امریکا ولسمشر باید په وینزویلا، غزې او نورو ځایونو کې د خپلو کړنو له امله وشرمېږي.
په ایران کې له کابو دوو اوونیو راهیسي پراخ لاریونونه او مظاهرې روانې دي او په ترڅ کې یې خلک د حکومت او نظام د بدلون غوښتنه کوي.
سره له دې چې د ایران امنیتي ځواکونو په تشدد هڅه کړې چې د مظاهرو مخه ونیسي او مظاهره چیان د امریکا او اسراییل عوامل وښيي خو داسي ښکاري چې دې مظاهرو د ایران حکومت له جدي ننګونې سره مخامخ کړی دی.
د ولسمشر پزشکیان په وینا کې هم غذر او هم پټکې وې، له یوې خوا یې اعتراض کوونکو ته خبرداري ورکول او له بلې خوا یې د هغوی له کورنیو او مشرانو غوښتل چې خپلو اولادونو ته لارښوونه وکړي چې له اعتراضونو لاس واخلي.
ده له ایراني ولسه غوښتي چې د هېواد د ستونزو د حل لپاره یو موټی شي، او ویلي یې دي چې هېڅ وګړی دې ناامني نه خپروي او هېڅ انسان دې بل انسان نه وژني.
دا په داسي حال کې ده چې د ایران د حکومت مخالفې سرچینې ادعا کوي چې امنیتي ځواکونو سلګونه مظاهره چیان وژلي او سلګونه نور ټپیان کړي دي.
د ایران ولسمشر له خلکو غوښتنه کړې چې له «بلواګرو» ځان لرې وساتي، او ویلي یې دي چې حکومت د فساد د ریښو پر ضد جدي اقدامات کوي.
په ایران کې وروستي اعتراضونه د بد اقتصادي وضعیت او د ډالر او نورو اسعارو په وړاندې د ایراني ریالو د ارزښت د بې ساري ټیټېدو له کبله د تهران له بازاره پیل شول. دې اعتراضونو د ایران د اسلامي جمهوري نظام پښې په جدي ډول لړزولي دي.